بقى ياراجل تسيب الجبنة القريش المذهلة فى الصحة و تروح تشترى جبنة السم الهارى النباتية الدهن القاتلة للكبد والشرايين والقلب .

تعالى أقولك بس دى بتتعمل إزاى و دى بتتصنع إزاى وانت هتفهم قصدى .

 

الجبنة القريش أول مابيحلبو اللبن بيدخل على الفراز يتفصل منه القشطة اللى بعد كده بيتعمل منها الزبدة والسمنه و باقى اللبن منزوع الدسم ده يتعمل منه الجبنة القريش يعنى الجبنة القريش عبارة عن بروتين اللبن منزوع الدسم وطبعا غنيه بالمغذيات تابع هشرح .

 

الجبنة النيلة السم نباتى الدهن دى حضرتك خلطه زيت نخيل بتاع العربيات والتكاتك على لبن بودرة على لون على طعم على كيماوى و توكل على الله و صب فى الخلاطة و عبى فى العلبة.

 

مشكلتنا مع زيت النخيل إن المستخدم زيت مهدرج مؤكد بما لا يدعو مجالا للشك و منشور مئات الدراسات فيه إنه متلف للشرايين و القلب و الكبد ومسبب للسكر والضغط والجلطه ومسرطن وانه مينفعش غذاء نهائى دا اخره تحطه فى شمعه ولا كريم أكل لا لا لا .

نرجع للعسليه الجبنة القريش نزعنا منها الدهن الحيوانى حط انت بقا التاتش بتاعك زيت الزيتون ياباشا زيت بذر الكتان و شوية طماطم حلوين كده و استمتع بأحلى غذاء غنى بالكالسيوم و البروتين ال ١٠٠ جرام قريش فيها ١٢ جرام بروتين .

 

لو أنت سامحك الله مبتحبش الجبنة القريش البديل بتاعها الصحى هيه الزبادى اليونانى و ياسلام الللللللله شوية عسل على الزبادى اليونانى و ياسلاااااااام حبة مكسرات كده للدهون الصحية يبقى أنت كده خدت البكتريا النافعة والبروتين من الزبادى اليونانى و السكر النافع من العسل و الدهون النافعه من المكسرات .