1- قناع قمر الدين لتنعيم البشرة وعلاج الحبوب والرؤوس السودا

قمر الدين بيحتوي على نسبة عالية من فيتامين A المعروف بفوايده في علاج شوائب البشرة زي الرؤوس السودا والحبوب, وكمان بيحارب علامات التقدم في العمر, وبيدي البشرة اشراقة ونعومة بسبب عنصر البوتاسيوم, والمعادن, ومضادات الاكسدة اللي بتقضي على الجذور الحرة اللي بتسبب التجاعيد.

انقعي قطعة قمر الدين حجمها متوسط في كوباية مية لمدة 6 ساعات, بعدها صفيه وحطي منه على بشرتك بقطعة قطن, سيبيه لمدة 20 دقيقة وبعدين اشطفيه بمية دافية, كرري الماسك مرة في الاسبوع وهتلاحظي مع الاستمرار بالفرق على بشرتك.

2- اعملي تونر طبيعي

كلنا عارفين اهمية التونر في تنضيف البشرة وعلاج كتير من مشاكلها والنهاردة هنقولكم على طريقة تونر طبيعي تعمليه بنفسك في البيت باستخدام خل التفاح.

1- خل التفاح بيساعد على تحسين البشرة بشكل عام, وبيعيد درجة الحموضة الطبيعية للبشرة اللي بتحافظ على صحة البشرة.

2- بيخفف بقع الشمس, وبقع العمر.

3- بيخلص البشرة من خلايا الجلد الميتة.

4- بيعالج حب الشباب, والندبات الناتجة عنه.

5- بيساعد على تقليل حجم مسام البشرة.

حطي اي كمية انتي عايزاها من خل التفاح في ازازة او برطمان, وبعدين ضيفي مية مقطرة ضعف كمية الخل, اقفلي الازازة ورجيها عشان تخلطي المية والخل, وكده يبقى التونر جاهز عندك

كل يوم قبل النوم خدي منه بقطنه وامسحي بيه بشرتك بعيد عن منطقة العين, وبعد ما ينشف حطي على البشرة كريم مرطب.

رجي التونر كل مرة قبل الاستخدام, احفظيه في مكان جاف وبارد وضلمة ومش شرط في التلاجة ممكن تسيبيه بره عادي بس يكون مكان مش سخن.

ولو ريحة خل التفاح مزعجة بالنسبة لك ممكن تضيفي له شوية مية ورد, او شاي اخضر, او اي نوع زيت اساسي زي زيت شجرة الشاي او اللافندر.

وممكن بدل المية العادية تضيفي مية اعشاب, هاتي اي نوع اعشاب مفضل عندك, حطي مية على النار ولما تغلي حطي فيها الاعشاب وسيبيها على نار هادية لمدة 30 دقيقة, وبعدين ارفعيها من على النار وسيبيها تبرد خالص وصفيها وخدي المية ضيفي لها خل التفاح.

3- حيلة بزبدة الكاكاو للانتفاخات والهالات السودا تحت العين

معظم البنات بيشتكوا من مشكلة الهالات السودا والانتفاخات تحت العين, عشان كده النهاردة جايبين لكم حيلة سهلة ورخيصة جدا هتعالج المشكلة وهي زبدة الكاكاو.

كل اللي هتعمليه هتدهني زبدة الكاكاو كل يوم تحت العين قبل النوم, وزبدة الكاكاو تعتبر بديل لكريمات العين اللي ممكن تكون غالية او مكلفة.

4- الكربوناتو للتخلص من الشعر اللي تحت الجلد

مشكلة بتقابل كتير من البنات بعد ازالة الشعر الزائد وهي مشكلة الشعر اللي بيظهر تحت الجلد, النهاردة جايبين لكم حل بسيط للمشكلة بمكونات طبيعية.

معلقة صغيرة كربوناتو.

معلقة صغيرة دقيق الشوفان.

معلقة كبيرة مية.

اخلطي المكونات كلها مع بعض لحد ما تتكون عندك عجينة سميكة, افردي العجينة على الجلد وسيبيها 5 دقايق وبعدين اغسليها بمية دافية, وممكن تكرريها حسب الحاجة.

5- تنعيم الرجل وازالة تشققات الكعبين

مشكلة تشققات وخشونة كعب الرجل مشكلة بيعاني منها كتير من البنات النهارة جايبين لكم وصفة سهلة لتنعيم الرجل وازالة تشققات وخشونة الكعبين.

– 2 كوب مية دافية.

– 1 كوب خل ابيض.

– 1 كوب من اي نوع غسول فم.

اخلطي كل المكونات مع بعض في طبق وانقعي رجلك فيها من 10 – 15 دقيقةوبعدين استخدمي حجر خفاف ادعكي كعب الرجل عشان تتخلصي من كل الجلد الميت وبعدين نشفيها ورطبيها كويس بكريم او زيت زيتون.