1- متحميش ابنك عمال علي بطال خلي الحموم لوقته... ممكن مرة او ٢ اسبوعيا...والحموم يكون بالليل وينام ميخرجش بعدها...

عندك ماشاء الله 3 اطفال بلاش تحميهم كلهم في يوم واحد علشان تعرفي تحمي كل واحد وتدفيه قبل ماياخد برد...

2- ابنك اللي بيروح الحضانه او المدرسه لازم تلبسيه لبس مناسب للجو لا خفيف ولا تقيل بزيادة...

3- شرب الماية قبل الخروج من البيت .. وكمان غسيل الوجه واليدين بمايه من الحنفيه يوميا قبل الخروج من البيت الصبح او بالليل....

4- السوايل الدافيه ثم السوايل الدافيه ثم السوايل الدافيه يانسون ماشى.... قرفة وماله... تيليو يا حبذا... نعناع يا جماله...

5- العيل الرخم اللى بيكشف نفسه بالليل وهو نايم.... نزود حتة لبس قبل النوم...

6- تهويه المنزل يوميا في الوقت من 10 صباحا الي 1 ظهرا...علشان نجدد هوا البيت ننقي الجو وندخل هوا نضيف....

7- لو في حد في البيت بيدخن ياريت يدخن بره البيت واول مايدخل يغير هدومه وياخد دش لان الدخان حتى اللى على اللبس ليها اثر سلبي علي كل الاطفال خاصة العيال اللى عندهم حساسية....

8- الموز والتفاح بيقوووووا المناعه كتروا منهم للاطفال في الشتاء.... الكمثري والبلح كلهم فيتامين C وحديد .... معلقه عسل نحل علي معلقه زيت زيتون علي علبه زبادي يوميا تقوي المناعه وتفتح النفس علي الاكل...

9- لو انتشرت عدوي في الجو قعدي ابنك من المدرسه مش تستني لما يتعدي ....و لو ابنك تعب اتقي ربنا في ولاد الناس وقعديه من المدرسه علشان ميعديش حد...

ولما يبقي حد في العيله عنده برد ياريت يستخدم كمامه علي الانف والفم بلاش ينشر الفيرس للعيله كلها....

10- لو ابنك عنده حساسيه بلاش يلبس صوف او يلعب بلعب الدباديب والحاجات اللي بتعبي تراب علشان متكتمش نفسه...

11- اكل طازه كل يوم وبلاش كسل ( شوربه الخضار- شوربه العدس - بعد الشر شوربه فراخ) مفيده جدا في البرد...

12- لو بتلبسي ابنك قطعه وحده او بتلبسيه 10 قطع زي مايقلع يلبس يعني زي ما قلع 3 يلبس زيهم 3 مثلا يعني...

13- لما تحبي ترضعي ابنك مش تاخديه في جو برد وترضعيه لازم ترضعيه في مكان دافي...

ليه بقى؟

- لأن الطفل لو في مكان برد هيبقي زوره بارد واللبن بطبعه هينزل دافى يبقي دافى علي بارد يزود نشاط البكتريا والفيروسات...

14- لو بترضعي صناعي طبعا مش هوصيكي تغلي الببرونات كويس اوي لقتل الميكروبات اللى ممكن تكون موجودة...

15- العشاء لكل العيله يكون خفيف جبنه وعيش ومربي بلاش محشي ولا طبيخ في العشا ابوس ايديكم...ولما الواد يرجع نقول من ايه؟

16- ادي ابنك فيتاميناته الضروريه فيتامين D كل يوم ولو فيه انيميا ادي حديد.... فيتامين C وفيتامين A جامدين في الشتا وبيزودو المناعه جدا وبالدراسه وبالخبره وملهومش اضرار....

17- معظم التهابات الشتاء فيروسيه مش بكتيرية بلاش تجري وتدي مضاد حيوي عمال علي بطال....

18- رشح وعطس تنظيف للانف بمحلول ملح وشفاط للانف خاصة العيال الصغيرين...

19- حساسيه انف بخاخ نيزونكس Nasonex او نازوكورت Nasocort او افاميز Avamys ومضاد للحساسيه وعيشى....

20- التهاب حلق متكرر ولوز وضعف مناعة برونكوفاكسيوم 10 ايام كل شهر لمدة 3 شهور متتالية....

21- حساسيه صدر....جلسات عند اللزوم وموسع شعب

ومتابعه مع دكتور بيفهم وشاطر يوصف لك علاج وقائى يظبط معاه فى الشتا....

وخلى بالك... مش كل كحه تبقى حساسيه صدر وجلسات وتوهمي نفسك لازم تتاكدي انها حساسيه صدر الاول بلاش حد يشتغلك....

22- نزله شعبيه او إلتهاب رئوي نتابع عند الدكتور لحد ما الدور يتحسن لأن الادوار دى بتطول شوية...واوعى تنسى غسيل الانف نص العلاج في الحالات دى خاصة في الاطفال الرضع....

23- تطعيم الانفلونزا الموسميه بيجيب نتيجه حلوه اوي بالذات مع اطفال الحساسيه بس مع شويه محافظه واحتياطات للبرد...وكمان تطعيم الالتهاب الرئوي دا مفيد لكل اللي بيتكرر ليه التهاب رئوي في الشتا...

24- متستخسرش في طفلك تحليل او اشعه تثبت بيها هو عنده ايه ده الصح....

25- من اسوء الامراض في الشتاء النزله المعويه لأن اغلبها بسبب فيروس الروتا واللى بيعمل جفاف بسرعة جدا... متكسليش تكشفي بسرعه علي النزله المعويه ومحلول معالجة الجفاف اوعى تقصرى فيه...

فى النهاية اذكركم واذكر نفسى....

داوو مرضاكم بالصدقة... أكثروا من الصدقات ربنا يحمي اولادنا واولادكم يارب...

يا رب... شتاء سعيد على كل الاطفال