اعمل التمرين دا وأنت قاعد مكانك على الكرسي في الشغل أو البيت، واسمه (Seated Figure 4 Stretch).

التمرين ده ليه؟ ✔︎ بيفك "الكلبشة": القعدة الكتير بتخلي عضلة عميقة اسمها (Piriformis) تضغط على العصب، وده اللي بيعمل تنميل أو وجع شبه "عرق النسا". التمرين ده بيحرر العصب ده فوراً.

✔︎ حماية للقطنية: طول ما حوضك "مقفول"، ضهرك هو اللي بيدفع الثمن في أي حركة. لما بتلين الحوض، ضهرك بيرتاح والحمل بيتشال من عليه. ✔︎ بيحسن أداءك في الجيم: لو بتلاقي صعوبة تنزل "سكوات" كامل (Full Range) أو ركبك بتضم لجوه، التمرين ده هو الحل السحري عشان يفتح مجرى الحركة.

اقعد على حرف الكرسي وضهرك مفرود "مسطرة" (اوعى تتني ضهرك).

حط الأنكل (كاحل) رجلك اليمين فوق ركبتك الشمال (عامل شكل رقم 4).

حط إيدك اليمين على ركبتك المرفوعة واضغط ضغطة خفيفة لتحت (بالراحة).

أول ما تميل سنتيمترات بسيطة هتحس "بشده" أو شد عميق جداً في المقعدة (Glute) من الجنب.. هو ده المطلوب.

أول مرة هتحس إن مفصل الفخذ "مش بيتحرك" ومش عايز يفتح معاك.. ده نتيجة سنين القعدة الغلط. اثبت في الوضع ده ٣٠ ثانية لكل رجل، وكرره وإنت قاعد شغال.

 

والنتيجة مش بس راحة من وجع الضهر، النتيجة "خفة" في حركتك ومشيتك، هتحس إن رجلك سايبة وحرة مش مربوطة.

جربوه دلوقتي وأنتم قاعدين بتقروا البوست، وقولولي مين عرف يميل بضهر مفرود ومين ركبته فضلت عالية ومش راضية تنزل؟

ربنا يمتعكم بالصحة ويبعد عنكم أي ألم، ومستني دعوة حلوة منكم بظهر الغيب