الميّه من أهم الحاجات اللي جسمك محتاجها، قبل الأكل وقبل أي حاجة تانية…

وفوايدها كتير جدًا، ونقصها بيعمل مشاكل كتير (ودي لوحدها موضوع كبير).

طيب المهم… أشرب قد إيه؟

هتلاقي ناس تقول 3 أو 4 لتر، وناس تقول 8 كبايات، وناس تقول اشرب لما تعطش!

بس بعيد عن الكلام العشوائي، فيه طريقتين صح

وده كلام دكتور Eric Helms في كتاب

The Muscle & Strength Pyramid - Nutrition

الطريقة الأولى:

تشرب 1 لتر لكل 23 كجم من وزنك

يعني لو وزنك 70 كجم

70 ÷ 23 ≈ 3 لتر في اليوم

دي طريقة سهلة… بس مش عملية لكل الناس

ليه؟ لأن مش كل الناس زي بعض

واحد بيعرق أكتر من التاني

واحد عايش في حر والتاني في جو ساقع

واحد بيتمرن في جيم مكيف والتاني لأ

فممكن اتنين نفس الوزن

واحد محتاج 3 لتر والتاني 4 أو حتى 5

وده يودينا للطريقة التانية (وهي الأدق):

تتابع لون البول

لازم يكون عندك حوالي 5 مرات في اليوم

لون البول فيهم فاتح جدًا أو شبه شفاف

(5 مرات clear urination في اليوم)

لو بتتمرن:

خلي مرة أو اتنين منهم بعد التمرين أو أثناءه

واشرب ميّه على فترات خلال التمرين (حوالي لتر)

مهم جدًا:

ما تدخلش تتمرن وانت عطشان أو جسمك ناقص سوائل

لأن لو فقدت 2% من سوائل جسمك

أدائك هيقل في التمارين الهوائية

ولو فقدت 3%

قوتك نفسها هتقل

ملحوظة مهمة:

اشرب ميّه على مدار اليوم، مش مرة واحدة

يعني بدل ما تشرب لتر مرة واحدة

اقسمها… مثلاً 200–250 مل كل شوية

ومتعتمدش على الإحساس بالعطش بس

خصوصًا في الشتا